नेपालगन्ज, १३ साउन । होटल डायमण्ड प्यालेसले खरिद गरेको भन्दा धेरै जग्गा कब्जा गरी प्रयोग गरेको मालपोत कार्यालयको रिकर्डबाट खुलेको छ । भूमि सुधार तथा मालपोत कार्यालयमा मिति २०७८ असोज १४ गते दिपेन्द्र अग्रवालको नामबाट होटल डायमण्ड प्यालेसको नाममा खरिद गरेको राजीनामाको अनुसार दुई कित्ता गरी जम्मा ७ कठ्ठा १३ धुर जग्गा खरिद गरेको देखिएको छ ।
होटल डायमण्ड प्यालेसले जुँगे महादेव र ऐलानी गरी करिब १६ कठ्ठा जग्गा कब्जा गरेको विषयमा ध्वनिखबर मिडियाले जिल्ला प्रशासन कार्यालय बाँके तथा विभिन्न निकायमा छानबिनको लागि उजुरी निवेदन दिँदा अख्तियार दुरुपयोग अनुसन्धान आयोगले छानबिन जारी राखेको छ । अख्तियारले छानबिन गर्ने क्रममा मालपोत तथा नापी कार्यालयमा रहेको प्राय सबै डकुमेन्ट गायब गरिएको जानकारी पनि आएकोले अख्तियारले छानबिनको प्रक्रिया कायम नै राखेको बताएको छ ।
भूमि सुधार तथा मालपोत कार्यालयमा रहेको रिकर्ड अनुसार मिति २०७८ असोज १४ गते दिपेन्द्र अग्रवालको नामबाट कित्ता नं. १७ (नक्सा संकेत नं. ०३५१४५००१) को २३०२.८० वर्ग मिटर र कित्ता नं. ९ (नक्सा संकेत नं. ०३५१४४९०५) को ११२.८० गरी कुल ७ कठ्ठा १३ धुर जग्गा व्यवसायिक तथा बसोबासको लागि भनी होटल डायमण्ड प्यालेसले खरिद गरेको देखिएको छ ।
होटल डायमण्ड प्यालेसले खरिद गरेको ७ कठ्ठा १३ धुर जग्गा भएपनि प्रयोगमा ल्याएको अर्थात कब्जा गरिएको जग्गा अत्यधिक भएकोले यस विषयमा अख्तियार दुरुपयोग अनुसन्धान आयोगले यसैलाई आधार मानी छानबिनको प्रक्रिया अगाडि बढाउने बताएको छ ।
जुँगे महादेव र ऐलानी गरी करिब १६ कठ्ठा जग्गा कब्जा गरेको विषयमा अख्तियारले छानबिन गरीरहेको अवस्थामा होटल डायमण्ड प्यालेसले कब्जा गरी प्रयोगमा ल्याएको थप जग्गा फुकुवा गरी जुंगे महादेव र ऐलानी जग्गा फिर्ता लिई दिने विषयमा अब पुनः छानबिन कार्य थालनी गर्ने बताएको छ ।
(बाँके प्रहरी प्रशासनको आडमा होटल डायमण्ड प्यालेसले सम्मानित बाँके जिल्ला अदालतको फैसला र नेपाल राजपत्रको विरुद्ध गई ह्याप्पी आवर क्यासिनोको बोर्ड लगाएको छ ।)
यसैगरी सम्मानित बाँके जिल्ला अदालतको मिति २०८१/१/२० गते आदेशको अवहेलना गरी ह्याप्पी आवर क्यासिनोको बोर्ड राखी क्यासिनो संचालन गर्ने तयारी गरीरहेकोले सम्मानित अदालतको ठाडो अवहेलना गर्दा पनि बाँके प्रहरी प्रशासनले कुनै चासो नलिँदा होटल डायमण्ड प्यालेसको मनोबल दिनप्रति दिन बढ्दो रहेको स्थानिय बताउँछन् ।
गोल्डेन गेमिंग इण्टरनेशनल प्रा.लि.का राजु पोपट भागवतले सम्मानित बाँके जिल्ला अदालतमा मुद्दा दायर गर्दा मिति २०८१/१/२० गते सम्मानित बाँके जिल्ला अदालतको आदेशमा ‘सम्झौतामा उल्लेख गरेबमोजिमको क्यासिनो भवन हाल यथास्थितिमा राखि सो स्थान र भवन अन्य तेस्रो पक्षलाई भाडामा दिने तथा क्यासिनो संचालन गर्न दिने समेतका कुनै काम नगर्नु नगराउनु भनि प्रतिवादीहरुका नाममा मुलुकी देवानी कार्यविधि संहिता २०७४ को दफा १५६(२) बमोजिम प्रस्तुत आदेश गरिदिएको छ ।’ उल्लेख गरिएको छ भने करिब २ महिना अघि सम्मानित बाँके जिल्ला अदालतले गोल्डेन गेमिंग इण्टरनेशनल प्रा.लि.का राजु पोपट भागवतको पक्षमा सम्झौता अनुसार १० वर्षसम्म होटल डायमण्ड प्यालेसको कम्पाउण्डमा क्यासिनोको लागि निर्माण गरिएको भवनमा क्यासिनो संचालन गर्न पाउने फैसला समेत गरेको बताइएको छ । मुद्दा चल्दाको अवस्थामा करिब ३ वर्ष समय बिति सकेकोले बाँकी रहेको करिब ७ वर्षको लागि गोल्डेन गेमिंग इण्टरनेशनल प्रा.लि.का राजु पोपट भागवतले नै क्यासिनो संचालन गर्न पाउने सम्मानित बाँके जिल्ला अदालतले फैसला गरेको छ ।
(स्वस्थ्य तथा बलियो मुटुको लागि केएल दुगडको कच्ची घानीको शुुद्ध तोरीको तेल सदैव प्रयोग गरौं ।)
सम्मानित बाँके जिल्ला अदालतको आदेश र फैसला भएतापनि बाँके प्रहरी प्रशासनको आडमा होटल डायमण्ड प्यालेसले नेपाल राजपत्रको विरुद्ध गई ह्याप्पी आवर क्यासिनोको बोर्ड समेत राखिएको छ । सम्मानित बाँके जिल्ला अदालतले गरेको फैसलाको पूर्ण पाठ आउनासाथ गोल्डेन गेमिंग इण्टरनेशनल प्रा.लि.का राजु पोपट भागवतले क्यासिनो संचालन गर्ने बताएको छ ।
