काठमाडौं, ३२ असार । ध्वनिखबर मिडियाले विगत ७ महिनादेखि नेपालगन्जबाट लखनउको अस्पतालसँगको सेटिंगमा नेपाली विरामीलाई लखनउ पठाई लाखौं रकम लुट्ने विरुद्ध चलाएको अभियानलाई स्वास्थ्य तथा जनसंख्या मन्त्रालयले इमेल पठाई धन्यवाद दिएको छ । साथै स्वास्थ्य तथा जनसंख्या मन्त्रालयको सचिव डा. विकास देवकोटाको आदेशमा इमेल पठाई भोलिका दिनमा मेडिकल माफिया बिरुद्धको कार्यमा यही स्तरमा सपोर्ट र भविष्यमा सहकार्य गर्ने भनिएको छ ।
ध्वनिखबर मिडियाले नेपाली विरामी लुटिएको विषयमा सामान्य समाचार बनाउँदा लखनउ गोमतीनगरस्थित क्रिसेन अस्पतालका संचालक मो. इस्तिफाकको साथै उनकै कर्मचारी सुजित सिंह काठमाडौं आई मासिक रु. ४ लाखको अफर दिएपछि स्वास्थ्य तथा जनसंख्या मन्त्रालयसँग समन्वय गरी मेडिकल माफिया विरुद्ध २०८१ मंसिर महिनादेखि अभियान नै चलाएको थियो । स्वास्थ्य तथा जनसंख्या मन्त्रालयको समन्वयमा चलाइएको अभियानमा नेपालगन्जस्थित मेडिकल फार्मेसी र एम्बुलेन्स चालकसँग हात मिलाई मेडिकल माफिया समूह सदस्य बारेमा समेत अनुसन्धान गरिएको थियो । मेडिकल माफियाको अभियानमा अफर र बार्गेनिंगको विषयमा स्वास्थ्य तथा जनसंख्या मन्त्रालयसँग डेली अपडेट गराइएको थियो ।
लखनउ गोमतीनगरस्थित क्रिसेन अस्पतालका संचालक मो. इस्तिफाकसँग नेपालगन्जस्थित केही फार्मेसी र एम्बुलेन्स चालकसमेत मिलेर नेपाली विरामीलाई लखनउ पठाई लाखौं लुट्ने गरेको तथ्य बाहिर आई केही पीडित नेपाली विरामीको लाखौं रकम ध्वनिखबर मिडियाको सक्रियता मेडिकल माफिया समूहबाट फिर्ता समेत गर्न लगाएको भिडियो सार्वजनिक समेत भएको छ ।
मेडिकल माफियाको नाइकेको रुपमा चिनिने लखनउ गोमतीनगरस्थित क्रिसेन अस्पतालका संचालक मो. इस्तिफाकलगायत उनका लखनउ निवासी सुजित सिंहसहित नेपालगन्जका करिब १० जना मेडिकल दलालको नाम प्रमाणसहित दिई यस विषयमा यी माफिया समूहहरुलाई हिरासतमा राखी अनुसन्धान र कारवाहीको गर्नको लागि प्रधानमन्त्री तथा मन्त्रिपरिषदको कार्यालय, सिंह दरबारमा निवेदन बुझाई सकिएको छ ।
स्वास्थ्य तथा जनसंख्या मन्त्रालयको मापदण्ड अनुसार एम्बुलेन्स दुरुपयोगको विषयमा ध्वनिखबर मिडियाले पहलमा मन्त्रालयले जिल्ला प्रशासन कार्यालय, बाँकेलाई पत्र पठाउँदा पनि अहिलेसम्म बाँके सिडियो धर्मराज जोशीले कुनै ठोस कदम नचाल्दा एम्बुलेन्स दुरुपयोग अहिले कायम रहेको छ । बाँके सिडियो धर्मराज जोशीले अवैध रुपमा संचालनमा आइरहेको एम्बुलेन्स पार्किग समेत हटाउन सकेका छैन भने बाहिर जिल्लाको एम्बुलेन्स नेपालगन्जमा ल्याई एम्बुलेन्स सेवा भन्दा व्यापारिक दृष्टिकोणले संचालन हुँदा पनि बाँके सिडियो जोशीले कुनै वास्ता समेत गरेको देखिदैन ।
यसैगरी हाल औषधी व्यवस्था विभागका महानिर्देशक नारायण ढकालसँगको समन्वयमा नेपालगन्जस्थित फार्मेसीहरुले लाइसेन्स वाहक बिना अवैध रुपमा औषधी बिक्री गरेको तथा विभागमा दर्ता नभएका औषधी बिक्री गरेकोमा नेपालगन्जस्थित औषधी व्यवस्था विभागका प्रमुख निलु श्रेष्ठको नेतृत्वमा छापा मार्ने कार्य यथावत राखिएको छ भने दिपेश श्रेष्ठको सुपा देउराली फार्मेसी र धर्मविर कहारको पवनदुत फार्मेसीमा दर्ता नभएको औषधी भेटिएपछि कारवाहीको लागि माथिल्लो निकायमा फाइल पठाएको बताइएको छ ।
भारतसँग जोडिएका सिमा नाकाका जिल्लामा मेडिकल माफियाले स्थानिय प्रहरी प्रशासनलाई लोभ लालच दिई आफु अनुकुल काम गराउन सफल हुने गरेको चर्चासँगै भारतीय र नेपालको नाकामा रहेका मेडिकल दलालहरुलाई प्रहरी प्रशासनले संरक्षण गरेको समेत विभिन्न घटनाक्रमले प्रष्ट पारेको छ ।
नेपालगन्ज वडा नं. १२ अर्थात नर्सिंग होम नजिकै एम्बुलेन्सको अवैध पार्किंग हुँदा पनि जिल्ला एम्बुलेन्स व्यवस्थापन समितिको अध्यक्ष तथा प्रमुख जिल्ला अधिकारी (सिडियो) ले कुनै ठोस कदम चालेको भने देखिदैन । अवैध पार्किंग हटाउने पर्नेमा उल्टै संरक्षण दिएको व्यापक चर्चाको विषय बन्न पुगेको छ ।
