नेपालगन्ज, ०५ भदौं । नेपालगन्जको अति ब्यस्त बजार धम्बोझीमा रहेको न्यू सिद्धी विनायकका अर्बपति मालिक विनोद पोद्दारका कान्छा छोरा अंकित पोद्दार आफ्नै घरमा काम गर्ने महिलामाथि जबरजस्ती करणी गर्ने प्रयासमा मोटो रकम खर्च गरेर जिल्ला प्रहरी कार्यालय बाँकेमा एक रात खोरमा बसी पीडितसँगको सहमतीमा शुक्रबार खोरमुक्त भएका छन् ।
अर्बपति विनोदका छोराले बुधबार धुमधामका साथ आफ्नो जन्मदिन मनाएको भोलि पल्ट अर्थात बिहीबार आफ्नै घरमा काम गर्ने महिलाको इज्जतमाथि हात हाल्ने प्रयास गरेलगत्तै पीडित महिलाले प्रहरी समक्ष रिपोर्ट दिएपश्चात तत्काल नै घटना भएको घरमा पुगी अंकित पोद्दारलाई पक्राउ गरी खोरमा राखेको थियो ।
अर्बपति विनोदका छोरा खोरमा पुग्नासाथ केही मानव अधिकारकर्मी समेत जिल्ला प्रहरी कार्यालय पुगे पनि शुक्रबार करिब २ बजे पीडित महिलाले जिउ छामछुम गर्ने प्रयास गरेको भन्दै मुद्दा दर्ता नगर्ने भनी बताएपछि शुक्रबार दिउँसो २ बजे पीडक अंकित पोद्दार खोर मुक्त भएका थिए ।
पीडित महिलाले जबरजस्ती करणीको प्रयास गरेको भन्दै उजुरी दिन पुगेकी महिला भोलीपल्ट मुद्दा दर्ता नगर्ने भनेपछि पैसाको खेलमा सहमती भएको विषयमा अहिले नगरमा व्यापक चर्चाको विषय बन्न पुगेको छ ।
उक्त घटनाको विषयमा न्यू सिद्धी विनायक पसलको छेउछाउमा काम गर्ने एक कर्मचारीले भने (ध्वनिखबरमा भ्वाइस रिकर्ड सुरक्षित राखिएको छ) –‘घटना साम्य पार्न विनोद पोद्दारले प्रहरी गुल्मको कुनामा आफ्नै गाडीमा रु. ४ लाख ५० हजार दिएर पठाएको हामीले नै देखेका छौं । अर्बपति विनोद पोद्दारको यस घटनालाई दबाउन पक्कै पनि करिब रु. ४० लाखको हाराहारीमा खर्च भएको हुनुपर्छ । पैसावाला धनाढयले यति रकम खर्च गर्नु सामान्य हो ।’
यस विषयमा धनाढय अर्बपति विनोद पोद्दारसँग सत्यतथ्य बुझ्न खोज्दा दुई दिनसम्म पुजाको बहाना गर्दै समय नभएको बताउनु भयो । अन्य दिनको शनिबारमा पसल खुला राख्ने न्यू सिद्धि विनायक पसल भने आज बन्द राखिएको छ।
गरिब महिलामाथि जबरजस्ती करणीको प्रयास गर्ने धनाढय व्यक्ति भएको कारण समाजमा आफ्नो छोराको कर्तुत सार्वजनिक नहोस भन्ने चाहना अनुसार अर्बपति विनोद पोद्दारले ठुलै मेहनत समेत गरेका थिए ।
जिल्ला प्रहरी कार्यालय, बाँकेमा करिब २ महिना अघि सरुवा भई आएका प्रहरी उपरिक्षक श्याम कृष्ण अधिकारीको कडा आदेश र निर्देशनको कारण प्रहरीभित्र एउटा डर पैदा हुनुको साथै यस्ता घटनामा विस्तारै कमी आएको छ भने बाँके प्रहरीको इतिहासमा दुई महिनामैं करिब ५० लाख रकम बराबरको भन्सार छली ल्याएको सामान नेपालगन्ज भन्सार कार्यालयमा आवश्यक कारवाहीको बुझाइएको छ ।
