काठमाडौं, १ असोज । केपी शर्मा ओलीले प्रधानमन्त्रीको पद सम्हाल्दै गरेका वाचा मध्ये नेपाली रेल भोलि अर्थात शुक्रबार नेपाली भूमिमा आउने भएको छ । प्रधानमन्त्रीको वाचालाई केही समूहहरुको कटु आलोचनाको रुपमा सामाजिक संजालमा टिकाटिप्पणी गरेसँगै अब त्यस्ता टिकाटिप्पणीहरु पूर्ण रुपमा बिश्राम हुने विज्ञहरुको भनाई रहेको छ ।
नेपालको रेलवे विभागले करिब ८४ करोड ६५ लाख रुपैयाँमा भारतसँग खरिद गरेको रेलको दुई थान सेट शुक्रबार नेपाल आइपुग्ने छ । एउटा इन्जिन र चारवटा बोगीसहितको दुई सेट रेल शुक्रबार अपराह्नसम्म जनकपुर आइपुग्ने रेलवे विभागले जनाएको छ ।
नेपाल रेलवे विभागका अधिकारीहरूका अनुसार विहारको हाजिपुर स्टेसनमा महिना दिनदेखि पार्किङमा राखिएको दुई रेल जयनगर जनकपुरका लागि प्रस्थान भई शुक्रबारसम्म नेपाली भूमिमा आउने बताइएको छ । रेलका दुवै सेट बुझ्न रेलवे कम्पनी र विभागका उच्च अधिकारीहरू पनि काठमाडौंबाट जनकपुरका लागि बिहीबार नै हिँडिसकेको रेलवे विभागका महानिर्देशक बलराम मिश्रले जानकारी दिए । ‘रेलको दुवै सेट शुक्रबार जनकपुर आइपुग्ने सम्भावना छ,’ उनले महानिर्देशक बलराम मिश्रले ध्वनिखबरसँग भने, ‘जनकपुरका लागि रेल हिँडिसकेको छ । भारतभित्र छ । शुक्रबार अपरान्हसम्म जनकपुर आइपुग्छ ।’
गत वर्षको वैशाख २६ मा खरिद सम्झौता गरेको दुई सेट रेल नेपाल आउने निश्चित भइसकेको भन्दै विभागका महानिर्देशक मिश्रले भने,‘शुक्रबार रेलको सेट बुझ्ने मात्र हो । भारतबाट कोंकण रेलवेजको टिम पनि रेलसँगै आउँदै छन् । रेलको कोच (बोगी) बनाउने इन्टेरियल कोच फ्याक्ट्रीका प्राविधिक टिमले नै रेल गुडाएर ल्याउँदै छन् ।’
शुक्रबार आउँदै गरेको दुई सेट रेलको रुट :
एक महिनाभित्रै नियमित सेवा थालिने उक्त रेलबाट जयनगर–जनकपुर र कुर्था रुटमै सञ्चालन हुनेछ । कुर्थादेखि महोत्तरीको बिजलपुरासम्म १७ किमि दूरीमा भने रेलवेको लिंक ओछ्याउने काम जारी छ । बिजलपुरादेखि पूर्व–पश्चिम राजमार्ग छुन्ने बर्दिवाससम्मको १७ किमिमा भने जग्गा अधिग्रहण र मुआब्जाको झमेलाले निर्माण प्रक्रिया लम्बिएको छ ।
